Өнгө ижил...

АН-ын гишүүд Хөрөнгө оруулалтын хуулийг дэмжиж буйгаа илэрхийлж, Л.Гантөмөр гэгч даргыгаа огцруулахыг шаардаж өнгөрөгч Баасан гарагт мэдээлэл хийсэн.  Шуудайд хийсэн үхрийн эвэр шиг болчхоод байгаа АН-д уг нь ард түмэн мөн ч их итгэж байгаа. Яагаад гэвэл “Одоо л АН сайн ажиллахгүй бол ард түмэнтэйгээ хамт авслагдахад бэлэн болсон” гэж үзэж буй учраас АН-ыг эв эеэ хичээгээд энэ сонгуулиар дорвитойхон шиг ажиллаадхаасай, хүчтэй сөрөг хүчин гэдгээ харуулаадхаасай хэмээж буй.

Гэтэл сонгуулийн марафон аль хэдийн  эхэлчихсэн энэ үед хагаралтай хэвээр, даргаа огцруулах тухай ярьж “Л.Гантөмөр, Х.Баттулга  гэх хүмүүстэйгээр сонгуульд өрсөлдөх юм бол  ёстой л хэлээ гаргаад, гараа өргөөд буугаад өгч байгаатай агаар нэг” гэж ярьж буй. Харин нэг хэсэг нь одоо огцруулах тухай ярьж байгаа нь АН ялагдахын, энэ сонгуульд урагш хөдлөхгүйн дохио” гэж үзэж эвтэй байхыг эрхэмлэхийг чухалчилж байна.

Товчхондоо бол АН-ынхны удирдлагын төвшний энэ арсалдааныг харахад өмнөх сонгуультайгаа өнгө ижил  гэдэг нь  ч харагдаж буйг булт олон ярьж, дүгнэж байна. Тэгээд ч хөзрөөр бол өнгө ижил гэдэг чинь хожигдохын цондон ч намдаа итгэсэн ард түмний итгэлийг хөсөр хаяж үл олно гэдгийг эрх биш ухаарч буй болов уу.