Ерөнхийлөгч асныг хуулийн байгууллагад дууджээ

Монгол Улсын 5 дахь Ерөнхийлөгч асан Х.Баттулгыг нүүрс болон төмөр замын хэргээр хуулийн байгууллага дуудсан. Энэ тухай мэдээлэл авсан тэрбээр уржигдар буюу лхагва гарагт төрийн ордонд хүрэлцэн ирж хөрөнгө оруулалтын тухай хуулийг эсэргүүцэж олны өмнө гарч ирсэн.

Нам гүмхэн байсан Ерөнхийлөгч асныг гэнэт олны өмнө гарч ирсэнд түмэн олон цочирч гайхахад хүрсэн. Хууль хяналтын байгууллагад дуудагдах бүртээ олны анхаарлыг өөр тийш нь саринулаад сурчихсан Ерөнхийлөгч асан энэ удаад бас л хуучин аргаа хэрэглэж.
Тодруулбал, оны өмнө болж өнгөрсөн нүүрсний сонсголоор Ерөнхийлөгч асан Х.Баттулгатай холбоотой нэлээд ноцтой мэдээллүүд яригдаж Хууль зүй, дотоод хэргийн сайд Б.Энхбаяр түүнтэй холбоотой асуудлыг хуулийн байгууллагад шилжүүлэх болно хэмээн мэдэгдэж байв. Энэхүү сонсголын дараа хэд хэдэн хүнтэй холбоотой хэрэг хуулийн байгууллагад шилжсэний нэг нь Ерөнхийлөгч асных байжээ.
Мөн үүгээр ч зогсохгүй түүнийг нүүрсний хэргээр шалгахаас гадна мөрдөгчдийн шүүгээнд байсан төмөр замын хэргийг нь ч сэргээн шалгахаар болсон тухай мэдээлэл байна. Хэрвээ уншигчид анзаарсан бол Х.Баттулга төрийн ордонд мэдээлэл хийхдээ “Би УИХ-д нэр дэвшихгүй” хэмээн мэдэгдсэн нь зүгээр ч нэг хэлээгүйн зангилаа нь одоо л тайлагдаж буй. Хэрвээ тэр нэр дэвшихээр бол СЕХ-ноос нэр дэвшигчийн мандатаа авч чадахгүй том аюул бий. Тиймээс л нэр дэвшихгүй гэдгээ нүүр бардам хэлж намынхнаа алсаас дэмжиж эрх мэдлийн үзүүрээс атгасан шигээ суухыг тэрбээр хүссэн байж ч болох юм.
Тэгэхээр хэзээнээсээ Ерөнхийлөгч асныг шүүмжилж ирсэн Хууль зүй, дотоод хэргийн сайд Б.Энхбаяр сонгуулиас өмнө түүнтэй холбоотой хэд, хэдэн хэргийг явуулж түүнийг улстөрөөс шахан гаргах ажлыг ч хийж мэдэхээр байна.
Ямартай ч уснаас хуурай гараад сурчихсан Ерөнхийлөгч асан энэ удаад нүүрсний болон төмөр замын хэргээс мултарч чадах эсэхийг харах л үлдлээ.