Л.Цэдэвсүрэнд Монголын төр өртэй юу

Төрийн албаны зөвлөлийн гишүүн С.Цэдэндамба, Б.Баатарзориг нарын бүрэн эрхийн хугацаа дууссантай холбогдуулан Засгийн газраас Л.Цэдэвсүрэн, УИХ-аас Б.Пүрэвдагва нарыг нэр дэвшүүлжээ. Нэр дэвшигчийн сонсголыг энэ сарын 16-нд зохион байгуулахаар болоод байгаа юм.
Төрийн албаны зөвлөлийн гишүүнд Л.Цэдэвсүрэнг нэр дэвшүүлснийг олон нийтийн хувьд тун таагүй хүлээн авч байгаа аж. Учир нь Л.Цэдэвсүрэнгийн хувьд сүүлийн 30 жил Боловсрол, шинжлэх ухааны яаманд ажилласан нэгэн. Тэр ч утгаараа нэг салбарыг боловсон хүчний хомстолд оруулсан хүн бүхэл бүтэн Монгол Улсын төрийн албаны зөвлөлийн гишүүн болох нь хэр зохистой хэрэг вэ.
Хэдий түүнийг олон жил мэрит зарчмаар өсөн дэвшиж ажиллаж байгаа гэдэг ч яамны үе, үеийн албан хаагчид нь ам муутай байдаг. Үнэхээр тэр сайн ажилладаг нэгэн байсан бол өнгөрсөн хугацаанд БШУ-ны сайд, Төрийн нарийн бичгийн дарга байхдаа боловсролын салбарыг өөд нь татчих боломж хангалттай байсан.
Атал өдгөө боловсролын салбар шинэчлэлийн ажилдаа хамаг хөрөнгө, цагаа зарцуулж, боловсон хүчний хомстолд орчихсон байгаа шүү дээ.
Уг нь Төрийн албаны зөвлөлийн зорилго нь “Иргэдэд ойр, уян хатан, идэвхтэй, санаачилгатай бөгөөд цомхон, чадварлаг, үр дүнд чиглэсэн манлайлагч менежер бүхий төрийн албыг бүрдүүлэхэд оршино.” гэсэн байдаг. Гэтэл Л.Цэдэвсүрэн нэг байгууллагад 30 жил ажиллахдаа хөгжүүлэх байтугай өөд нь таталгүй салбараа боловсон хүчний хомстолд оруулчихсан хүн шүү дээ.