Сайдыг солиод сайжирлаа юу

Батлан хамгаалах салбарт гай биш гажуудал нүүрлэчихлээ. Оюутан хүүг хугацаат цэргийн албанд татаж, өнөөдөр тэр хэзээ эргэн ирэхгүйгээр эцэг, эх, гэр бүл, эх орноо орхин одлоо. Ойр дотнынхон нь гашуудаж байна. Харь элгийн хүмүүс салбарыг бүхэлд нь буруутгаж, эцэст нь салбарын сайдын албан тушаалын асуудлыг ч хөндөж байна.

Гэхдээ сайдыг солилоо гээд сайжрах уу. Бид нийтийг хамарсан,нийгмийн цочроосон олон үйл явдлын ард салбарын сайдыг огцруулж байсан. Гэвч ард нь асуудал өөрчлөгдөж, сайжирсан нь хаана байна.
Өнөөдөр Монгол Улс зэвсэгт хүчнээ бүх салбарын ард хаячихсан. Төсөв, санхүү батлагдах юмыг жил ирэх бүр танаж хасдаг, хоол ундны норм, амин дэм болон бусад хангалт муудсаар ирсэн. Ердөө зэвсэгт хүчинд хамаарах хуульд нэмэлт өөрчлөлт оруулж байгаагаас төсвийг нь танасаар ирсэн нь өнөөгийн нөхцөл байдалд хүргэж байгааг ч үгүйсгэх аргагүй.
Нөгөө талд гэм буруутай этгээдэд нь хариуцлага хүлээлгэх бус шууд салбарын сайдыг нь огцруулаад байвал төрийн албанд бугшсан дунд, доод шатныхан оршсоор байх юм биш үү.
Өдгөө цэрэг хүү амиа алдсан асуудлыг “нялх биетэй эмэгтэйг, нярайтай нь хамт өвлийн хүйтэнд гадаа машин руу явуулсан”-ы хариуцлагатай эн зэрэгцүүлж, салбарын сайд нь огцрох ёстой гэж байна.
Тухайн үед дээрх эмэгтэйг авч гарсан сувилагч, эмч, эмнэлгийн дарга хариуцлага хүлээх учиртай. Гэтэл “хаа холын” Ерөнхий сайд огцорсон.
Өнөөдөр яг тэр үйл явц давтагдаж байна. Цэрэг амиа алдсаны хариуцлагыг сайдад тохоод хав дарах уу.
Сайдыг огцруулж байгаа нь нэг талдаа хариуцлага мэт харагдаж байгаа ч харин ч эсрэгээрээ “сул” тавиад өнгөрч байна. Миний өмнөөс сайд огцрох юм чинь гэсэн шиг дунд, доод шатандаа төрийн албанд ажиллагсад чинь хөгжихгүй, хөдлөхгүй, бугшсаар байна.
Олон жишээ бий, одоо эргээд харахад. Зөвхөн Л.Оюун-Эрдэнийн Засгийн газар л гэхэд ЗТХ-ийн сайд Л.Халтарыг С.Бямбацогтоор, Эрчим хүчний сайд Н.Тавинбэхийг Б.Чойжилсүрэнгээр, БХБ-ын сайд Б.Мөнхбаатарыг Ц.Даваасүрэнгээр, ХХААХҮ-ийн сайд З.Мэндсайханыг Х.Болорчулуунаар, УУХҮ-ийн сайд Н.Ёндонг Ж.Ганбаатараар, Боомтын сайд Х.Булгантуяаг Б.Тулгаар, Эрүүл мэндийн сайд С.Энхболдыг С.Чинзоригоор сольсон. Иргэдийг хамгийн ихээр бухимдуулдаг ХНХ-ын салбарт л гэхэл А.Ариунзаяаг С.Сарангэрэлээр, Т.Аюурсайханаар, Х.Булгантуягаар гээд хичнээн солив. Гэлээ гээд салбар өөрчлөгдөв үү. Түгжрэлийн сайд гэгдэж байсан Ж.Сүхбаатарыг Б.Дэлгэрсайханаар солилоо. Нийтийн тээвэр ч үгүй, нэгдүгээр эгнээ ч үгүй болж өвлийн хүйтэнд иргэд л хохирч байна.
Солилоо, солигдлоо гээд яг хэвэндээ харин ч бүр эзэн биегүй болж аливаа төсөл, хөтөлбөр, хэрэгжүүлж байсан ажлууд нь гацаж улам бүр дордсон.
Яг энэ жишгээр хариуцсан ажилдаа эзэн болох хүн энэ төрийн албанд тун ховор болчхож. Энэ удаагийн асуудал л гэхэд хүүг төгсөх ангийн оюутан гэж байхад нь хүчээр цэрэгт татчихсан.
Энэ бол цэрэг татлагын комисс, нэгэнт татагдаад очиход хариуцаж байсан холбогдох албан тушаалтнууд, офицеруудын хайнга байдлаас үүдсэн харамсалтай хэрэг. Асуудлыг эцэслэн шийдтэл сайдын суудал бус үүрэг ажилдаа хайхрамжгүй хандсан хүмүүсийн тухайтад сайтар хэлэлцэн шийдвэр гаргах хэрэгтэй юм биш үү.