Photo Paparazzi ••• Жүжигчин Б.Амарсайхан Пентхаус шиг өрнөлтэй кино бүтээсэн үү

"17" продакшн “Voo”-тэй хамтран "Хохирогч" уран сайхны кино өчигдөр \2022.03.10\ нээлтээ хийлээ. 

Тус киноны зохиолыг  жүжигчин Б.Амарсайхан бичжээ. Харин продюсерээр түүний гэргий С.Уран ажиллаж, Б.Баярсайхан найруулсан байна. Кино нийтдээ 10 ангиас бүрдэх бөгөөд дөрөвдүгээр сарын 10-ны өдрөөс эхлэн албан ёсоор үзэгчдийн хүртээл болж эхэллээ.

Киноныхоо талаар жүжигчин Б.Амарсайхан "Та бүхэн манай киног тааж чадахгүй. Нэг анги дуусаад дараагийн анги эхлэхэд таны таамаглаагүй зүйлс өрнөж эхлэх болно. Үүнд би үнэхээр итгэлтэй байна" гэсэн юм. 

Мөн тэрбээр кино хэрхэн бүтсэн талаараа "Зохиолоо бид өнгөрсөн оны гуравдугаар сарын сүүлээс бичиж эхэлсэн. Ерөнхий санаа нь байгаад л байсан. Яг бүрэн төгс зохиол болгож эхэлсэн нь өнгөрөгч зургаадугаар сард. Ковид тусаад тусгаарлагдаж байхдаа зохиолоо эрчимтэй бичиж эхэлсэн. Дүр сонголт дээрээ бид их удсан. Жүжигчдээ сонгож, есдүгээр сарын 27-ноос зураг авалтаа эхэлж, хоёр сарын хугацаанд дуусгасан. Манай баг цөөн хүний бүрэлдэхүүнтэй. Нийт 23, 24 хүн л кино багт маань ажилласан" гэжээ. 

Харин түр сонголтын талаар "Манай жүжигчид бүгд өөр системээр суралцаж, мэргэшсэн хүмүүс. Жүжигчин Н.Цэнд-Аюушийн хувьд И.Нямгаваа найруулагчийн шавь. Харин Г.Ариана Германаас ирж, зураг авалтад оролцсон. Тэс өөр системээр суралцсан жүжигчид. Гэх мэтчилэн өөр өөр уур амьсгалтай жүжигчид нэгдсэн нь уур амьсгалыг гайхалтай болгосон. Найруулагч Б.Баярсайханы хэлснээр жүжигчид overact буюу хэтийдэн жүжиглэх тоглолт байхгүй, яг амьдрал дээрх өгөлт, хүлээн авалтыг гаргаж жүжиглэсэн. Сайн эсвэл муу гэсэн ангилалд багтахгүйгээр бүх уур амьсгал сүлэлдэн оршиж байгаа. Тиймээс сайн хүн, муу хүн гэдэг талаар дүгнэж, хэнийх нь талд орохоо үзэгчид өөрсдөө шийдэх байх" хэмээн киноныхоо талаар ярьжээ.