Их аварга Д.Дагвадоржид эрүү үүсгэсэн ч олдохгүй байна

Японы үндэсний бөхийн их аварга Д.Дагвадоржийг Өвөрхангай аймгийн цагдаагийн байгууллагаас эрүүгийн хэрэг үүсгэхээр болжээ.

Гэвч Д.Дагвадорж одоогоор олдохгүй байгаа бөгөөд утас нь холбогдохгүй, гэр бүлийхэн нь хаана байгааг нь мэдэхгүй байгаа аж. Тэрбээр Өвөрхангай аймгийн Есөнзүйл сумын 80 жилийн баярт МҮОНТ-ийн захирал М.Наранбаатартай таарахдаа ах Д.Сумьяабазарыг нь УИХ-ын сонгуульд дэмжсэнгүй хэмээн зодсон юм.

Хэдийгээр М.Наранбаатар цагдаагийн байгууллагад гомдол гаргаагүй ч Д.Дагвадоржид эрүүгийн хэрэг үүсгэх гэж байгаа талаар эх сурвалж мэдээлэв.

Учир нь М.Наранбаатар гомдол гаргаагүй ч гэрчүүдийн мэдүүлгээр түүнд эрүү үүсгэх аж. Мөн хэвлэл мэдээллийн хэрэгслээр гарсан мэдээллийг цагдаагийн байгууллага заавал шалгах ёстой байдаг. Энэ дагуу шалгаж, түүнд эрүүгийн хэрэг үүсгэх аж. Харин одоогоор түүнийг цагдаагийн байгууллагаас эрэн хайж байна.