Н.Төгсцогт өнөөдөр хүрэл медалийн төлөө тоглоно

Монгол Улсын Гавьяат тамирчин Н.Төгсцогт өнөөдөр Лондонгийн олимпийн рингэнд гурав дахь тулаанаа хийх гэж байна. Эхний хоёр тойрогт хүчтэй өрсөлдөгчдөө буулган авсан тэрбээр өнөөдөр хүрэл медалийн төлөө тоглох юм. Мэдээж учраагаа буулган авбал мөнгө, цаашлаад аваргын алтан медалийн төлөө өрсөлдөх боломжтой билээ.

Залуу гавьяатын өнөөдрийн өрсөлдөгч нь Узбекистаны тамирчин, 20 настай Ясурбек Латипов юм. Н.Төгсцогтын хувьд өмнө нь узбек боксчинтой огт таарч тоглож байгаагүй, тиймээс “битүү морь” байх магадлалтай гэнэ. Тоглолт орон нутгийн цагаар 20.45 буюу Монголын цагаар 03.45 цагт эхэлнэ.

Лондонгийн олимпийг зорьсон Монголын ширэн бээлийтнүүдээс Хөдөлмөрийн баатар, Гавьяат тамирчин П.Сэрдамба /49 кг/, ОУХМ Б.Түвшинбат /69 кг/ нар тэмцээнээ дуусгаад байгаа бол 64 кг-ын жинд Гавьяат тамирчин У.Мөнх-Эрдэнэ медалийн төлөөх тоглолтод шалгараад байгаа билээ. Тэрбээр Монголын цагаар 9-ний үүрээр 05.00 цагт рингний эзэн орны тамирчин Том Стокертэй тоглох юм.