Ерөнхийлөгчийн зөвлөх Д.Даваа АТГ-д шалгагдаж байна

Монгол Улсын Ерөнхийлөгчийн батлан хамгаалах бодлого, аюулгүй байдлын асуудал хариуцсан зөвлөхөөр ажиллаж байгаа дэслэгч генерал Д.Давааг АТГ-аас шалгаж байгаа талаар "Өнөөдөр" сонинд мэдээлжээ. Түүнийг Зэвсэгт хүчний жанжин штабын даргаар ажиллаж байхдаа тэтгэвэрт гарсан дэслэгч генерал Ц.Бямбажавыг эрдэм шинжилгээний ажилтнаар Зэвсэгт хүчний 311 дүгээр анги буюу Энхийг дэмжих ажиллагааны сургалтын төвийн ажиллагааны төвд ажиллуулж, сул цалин олгож байсан гэх асуудалд холбогдуулж шалгаж эхэлсэн хэмээсэн байна. 

Дэслэгч генерал Ц.Бямбажавыг 2017 оны арваннэгдүгээр сард тушаал гаргаж, дээрх албанд томилж байсан бөгөөд Зэвсэгт хүчний жанжин штабын даргын үүргийг түр орлон гүйцэтгэгч байсан хошууч Р.Сүхбат тушаал гарган 2019 оны хоёрдугаар сард Ц.Бямбажавыг чөлөөлсөн аж.

Нийтдээ 12.2 сая гаруй төгрөгийн сул цалин авсан гэх гомдол АТГ-т ирснээр Зэвсэгт хүчний жанжин штабын холбогдох албан тушаалтнуудаас тайлбар мэдүүлэг авах болж, улмаар дэслэгч генерал Д.Давааг шалгах болжээ.

Д.Даваа нь

• 1971-1981  – Сэлэнгэ аймгийн төвийн 10 жилийн сургууль,
• 1981-1986 – ЗХУ-ын Вольск хотын Цэргийн ар талын дээд сургууль,
• 1994-1997 – ОХУ-ын Санкт-Петербург хотын Цэргийн ар тал, тээврийн академи

Ажлын туршлага:

• 1986-1989 – МАА-ийн 162 дугаар ангид хүнс, хувцасны албаны дарга,
• 1990-1994 – Зэвсэгт хүчний  310 дугаар ангид хүнсний хангалтын тасгийн дарга,
• 1997-2000 – Зэвсэгт хүчний 256 дугаар ангид захирагчийн орлогч, ар талын дарга,
• 2000-2001 – ЗХЖШ-ын Ар талын газрын штабын орлогч дарга,
• 2001-2002 – Зэвсэгт хүчний 013 дугаар ангийн захирагчийн орлогч, ар талын дарга,
• 2002-2008 – БХИС-ийн Цэргийн дээд сургуулийн Ар талын тэнхимийн дарга,
• 2008-2009 – БХИС-ийн Ар тал эрхэлсэн дэд захирал,
• 2009.01       – БХЯ-ны Санхүү, хөрөнгө оруулалтын хэлтсийн дарга,
• 2009.06      –  БХЯ-ны Бодлогын хэрэгжилтийг зохицуулах газрын дарга,
• 2009-2015  – ЗХЖШ-ын Цэргийн хангалт, үйлчилгээний газрын дарга,
• 2015-2018  –  ЗХЖШ-ын даргаар ажиллаж байжээ