Ерөнхийлөгч Английн Хатан хаантай уулзав

Admin

2012/07/29

Хүн төрөлхтөний эв нэгдэл, энх тайван, итгэл найдварын бэлэг тэмдэг болсон Олимпийн наадам Лондон хотноо амжилттай үргэлжилж байна. Монгол Улсын Ерөнхийлөгч Цахиагийн Элбэгдорж Олимпод оролцож буй эх орныхоо тамирчдыг дэмжихээр Лондон хотноо хүрэлцэн очоод байгаа билээ. Энэ үеэр Олимпийн наадамд хүрэлцэн ирсэн бусад орны төр засгийн тэргүүнүүдтэй уулзаж ярилцаж, санал бодлоо солилцож байна.

Олимпийн наадмын нээлтийн үеэр Ерөнхийлөгч Ц.Элбэгдорж Английн Хатан хаан II Элизабеттэй уулзав. Ерөнхийлөгч Ц.Элбэгдорж, Англи Улс Зуны 30-р Олимпийг амжилттай зохион байгуулж байгаад нь баяр хүргээд, Олимпийн наадмын тухай болон хоёр орны харилцааны зарим асуудлаар санал солилцов.

Мөн энэ үеэр Ерөнхийлөгч Ц.Элбэгдорж, НҮБ-ын Ерөнхий нарийн бичгийн дарга Бан Ги Мүн, Олон Улсын Олимпийн хорооны Ерөнхийлөгч Ж.Рогге, Их Британийн Ерөнхий сайд Ж.Камерун, Хунтайж Чарльз болон Хатан хааны гэр бүлийнхэнтэй уулзаж ярилцлаа.

“Лондон-2012” Зуны Олимпийн наадмын нээлтэд 90 орчим төр засгийн тэргүүн, өндөр дээд хэмжээний зочид оролцсон юм. Олимпийн наадмын нээлтийн үеэр эдгээр хүндэт зочид уулзаж ярилцан, санал бодлоо солилцох боломж өргөн байв. Монгол Улсын Ерөнхийлөгч, ОХУ-ын Ерөнхий сайд Д.Медведев, БНХАУ-ын Төрийн зөвлөлийн дарга Д.Бангуо, ХБНГУ-ын Ерөнхийлөгч И.Гаук, Финландын Ерөнхийлөгч С.Нийнисто, Бразилийн Ерөнхийлөгч Д.Руссеф, Казахстаны Ерөнхийлөгч Н.Назарбаев, Италийн Ерөнхийлөгч Ж.Наполитано, Туркийн Ерөнхий сайд Т.Эрдагон, Испанийн Хатан хаан Софиа, АНУ-ын Тэргүүн хатагтай М.Обама нартай уулзаж ярилцав.

Сүүлд нэмэгдсэн мэдээ