ХОЙД СОЛОНГОС ЦӨМИЙН ТУРШИЛТ ХИЙСЭН БАЙЖ БОЛЗОШГҮЙ

Хойд Солонгосын цөмийн туршилтын цэг болох Пунге-ри Килжү орчимд өнөөдөр орон нутгийн цагаар 12.20 цаг орчимд 5.6 магнитудын чичирхийлэл мэдрэгдсэн талаар Йонхап агентлаг мэдээллээ.

Хятадын Газар хөдлөлтийн төвөөс мөн Хойд Солонгосын зүүн хойд нутагт 6.3 магнитудын хүчтэй чичирхийлэл мэдрэгдсэн талаар мэдэгджээ. Энэ нь газар хөдлөлт биш, хүчтэй тэсрэлт байж болзошгүй гэснийг Ройтерс агентлаг дамжуулав. Хүчтэй чичирхийлэл 12 цаг 29 минут 58 секундэд, газрын гүний “0” км-т болсон гэж Хятадын албаны хүмүүс мэдэгджээ.

12.29 цагт мэдрэгдсэн эхний доргилтоос хойш найман минутын дараа 4.6 магнитудын хүчтэй чичирхийлэл дахин мэдрэгдсэн байна.

Энэ хүчтэй чичирхийлэл нь Хойд Солонгос зургаа дахь удаагаа цөмийн туршилт явуулсан байж болзошгүй гэх хардлага, болгоомжлол төрүүлж байна. Одоогоор гэхдээ батлагдсан зүйл байхгүй байгаа юм. Хойд Солонгос хамгийн сүүлд өнгөрсөн оны есдүгээр сард цөмийн туршилт хийсэн.

Үүнтэй холбогдуулан БНСУ-ын Ерөнхийлөгч Мун Жэ-ин Аюулгүйн зөвлөлийг яаралтай хуралдуулахаар болсон байна.

Мөн Өмнөд Солонгосын цэргийн арми болзошгүй эрсдлээс сэргийлж, бэлэн байдалд шилжжээ.