МАН-ын долоон гишүүн Засгийн газрыг огцруулахаар гарын үсгээ зуржээ

Парламентад 65 суудалтай эрх баригч намын дотоод тэмцэл Ерөнхийлөгчийн сонгуулиас хойш олон нийтэд ил болж, зөрчилдөөн нь хурдацсаар байна. Шинэ Засгийн газар байгуулагдаад ердөө зургаан сар ч болоогүй байхад Засгийн газраа унагах тухай асуудлыг дотооддоо сөхөж байсан ч олон нийтээс ихээхэн нууцлаж байв. Улмаар  уг мэдээллийг МАН-ын зүгээс тухай бүрд нь үгүйсгэсээр ирсэн билээ.

Сүүлийн үед нам доторхи үл ойлголцлын асуудлаас үүдэн, УИХ-ын нэр бүхий гишүүд хамтран Засгийн газраа огцруулахаар гарын үсэг цуглуулж эхэлсэн байна. Одоогоор Засгийн газрыг огцруулах үндэслэлд МАН-аас нэр бүхий долоон гишүүн гарын үсэг зураад байгаа аж.  

Холбогдох хуулийнхаа дагуу Засгийн газрыг огцруулах үндэслэлийг парламентын 19 гишүүн дэмжсэнээр УИХ-аар хэлэлцэх нөхцөл бүрддэг. Асуудлыг хэлэлцээд УИХ-ын гишүүдийн 51-ээс дээш хувь нь дэмжвэл саналыг хүлээж авах горимтой билээ. Өөрөөр хэлбэл, Засгийн газрыг огцруулах үндэслэлийг УИХ-ын 76 гишүүний 39 нь дэмжвэл засаг унана гэсэн үг юм.

Харин МАН-ын даргын тухайд, парламент дахь эрх баригч намын 65 гишүүний 30 орчим нь У.Хүрэлсүхийг шууд дэмжихээ илэрхийлжээ. Үлдсэн хэсэг нь ирэх сард болох МАН-ын Бага хурлаар Ерөнхий сайд Ж.Эрдэнэбатыг намын даргын түр орлон гүйцэтгэгчээр томилж, “гал намжаах” асуудлыг дэмжихээр тохирцгоосон гэх мэдээлэл байгаа юм.

УИХ дахь МАН-ын гишүүдийн хувьд намд шинэчлэл хийхийг дэмжиж байгаа ч ерөнхий байдлаараа ирэх сард болох Бага хурлын шийдвэрийг харж байж байр сууриа тодорхой байдлаар илэрхийлэх сонирхолтой буй.