Мөндөрт өртсөн дөрвөн өрхөд гэр олголоо

Энэ сарын 24-ний өдөр Булган аймгийн Хутаг-Өндөр суманд хүчтэй мөндөр орж, хоёр хүн бэртэн, олон айлын гэр сүйдсэн талаар бид мэдээлсэн. Тодруулбал, долоон настай хүүхэд мөндөрт цохиулан ухаан алдаж, бие нь хөхөрсөн, есөн настай хүүхэд сумын ойролцоох “Баатарван” амралтын газрын орчимд аянганы цахилгаанд цохиулсныг эмнэлэгт хүргэсэн. 32 өрхийн гэр, хашаа нурснаас 10-н өрхийн гэр дахин ашиглах боломжгүй болсон аж. Булган аймгийн Засаг дарга Ц.Бат-Өлзийгөөр ахлуулсан ажлын хэсэг нөхцөл байдалтай танилцан, гэр орон нь сүйдэж, хүнд нөхцөлд байгаа Б.Батбаяр, Л.Чулуунбаатар, О.Отгонцагаан, У.Болдбаатар нарын дөрвөн өрхөд Онцгой байдлын газрын “Гамшгаас хамгаалах сан"-гаас таван  ханатай иж бүрэн гэр олголоо.