“Санал өгсөн цагаан хуудсаа нийлүүлээд 40 мянган төгрөгөөр зарсан”

Монгол Улсын Ерөнхийлөгчийн сонгууль энэ сарын 26-нд улс орон даяар зохион байгуулагдсан ч 50-иас дээш хувийн санал авсан нэр дэвшигч гараагүй тул дахин санал хураалт явуулахаар болоод буй. Энэ сонгуулиар өмнөх УИХ-ын сонгуулийн үеийнхээс ч илүүтэйгээр мөнгө тараасан, бүр ил цагаандаа гарсан гэх мэдээлэл сошиал сувгаар тархаж байв. Сонгуулийн өдөр санал өгснөө батлах бүртгэлийн хуудсаа 20 мянган төгрөгөөр зарсан бүсгүй ийн ярьж байна.

-Таныг санал өгсөн бүртгэлийн хуудсаа зарсан гэж сонслоо. Үнэн үү?

-Тийм ээ. Нөхөр бид хоёр саналын хуудсаа нийлүүлээд 40 мянган төгрөгөөр зарчихлаа. Мөнгө нь энэ байна. Яах вэ дээ, өгч байгаа юмыг авч  л орхилоо.

-Мөнгө өгч байгаа хүнтэй яаж уулзав?

-Саналаа өгөөд гараад явж байтал араас хүрээд ирсэн. Зарах уу гэхээр нь зарж л орхилоо. Хараад байх нь ээ бүх хүмүүс дээр очихгүй байх шиг байгаа юм. Хүмүүсээ харж байгаад хэл ам татлахгүй байж магад гэсэн хүмүүс дээрээ очиж байгаа юм шиг байна лээ.

-Та тэр хуудсаар яах гэж байгааг нь асуусангүй юу?

-Үгүй. Хурдхан мөнгөө аваад л салсан.

-ШИЙДВЭРЛЭСЭН ХЭРГҮҮД БҮГД ТОГТООГДООГҮЙ ГЭВ-

Энэ мэт сонгуулийн өдөр санал өгсөн бүртгэлийн хуудсаа бусдад зарсан гэх маш олон хүн байсан. Гэвч цагдаагийн байгууллага иргэдийн гомдол мэдээллийг шалгах явцад дээрх зүйл тогтоогдоогүй хэмээж байна.

Энэ удаагийн сонгуулийн өдөр  цагдаагийн байгуулагад Сонгуулийн тухай хууль, тогтоомж зөрчсөн гэмт хэрэг, зөрчлийн нийт 313 гомдол мэдээлэл бүртгэгдсэн байна. Үүний 256 нь нийслэлд, 48 нь хөдөө орон нутагт бүртгэгджээ.

Тодруулбал, бусдын нэр хүндэд халдаж, гүтгэсэн гэх гомдол нэг, архи согтууруулах ундаа хэрэглэсэн гэх хоёр, сонгуулийн хууль тогтоомж зөрчсөн гэх 27, мөнгө, эд зүйл тараасан тухай 69, хулгай, бичлэг хийсэн гэх мэт 90, санал өгсөн бүртгэлийн хуудас худалдаж авсан гэх 124 дуудлага бүртгэгдсэн байна.

Улмаар цагдаагийн байгууллага эдгээрээс 107 гомдол мэдээллийг шалгаж шийдвэрлэсэн бол үлдсэн 206 гомдол мэдээлэлд хуулийн хугацаанд холбогдох шалгалтын ажиллагааг хийж байгаа гэдгийг эх сурвалж мэдээллээ.

Цагдаагийн байгууллагаас авсан мэдээллээр шалгаж шийдвэрлэсэн 107 гомдол мэдээллийн 62 нь буюу 19,8 хувь нь сонгуулийн тухай хууль тогтоомж зөрчсөн нь батлагдаагүй, 44 нь буюу 14 хувь нь дуудлага мэдээлэл нь тогтоогдоогүй үндэслэлээр хэрэгсэхгүй болсон, нэг гомдлыг харьяаллын дагуу шалгуулахаар дотооддоо шилжүүлсэн  гэлээ.

Эх сурвалж: Medee.MN