iPhone-ийн ээлжит солиорол эхэллээ

Шинэ iPhone 5S худалдаанд гарахыг тэсэн ядан хүлээсэн хүмүүс аль хэдийнэ “Apple”-ийн дэлгүүрийн гадна дугаарлаад эхэлжээ. Apple-ийн шинэ бүтээгдэхүүн баасан гаригаас худалдаанд гарч эхлэх боловч iPhone 5S-ийн хамгийн анхны худалдан авагчид болох гэсэн яаруу хэрэглэгчид байраа эзэлсэн нь энэ. Apple-ийн Лондон дахь салбар дэлгүүрийн гадна хамгийн эхэнд дугаарласан Харари хэмээх энэ залуу iPhone 5S-ийг  худалдан авсан хамгийн анхны британи болохын тулд хоёр дахь хоногтоо майханд хонож байгаа гэнэ. Түүний дугаарласан байрыг зарим хүн 200 фунтээр худалдан авах санал тавьсан ч тэр 1000 фунтээс нааш хөдлөхгүй гэж хэлж байна. Түүний дараагийн дугаарт Грийн хэмээх өөр нэг залуу мөн л майхнаа босгон дугаарлаж байгаа бөгөөд тэр хоёр өмнө нь ч бас Apple-ийн гадаа дугаарлаж байсан учир хэдийнэ зүс мэддэг болжээ. 

Apple компани шинэ бүтээгдэхүүн гаргах бүрт, тэр тусмаа шинэ iPhone худалдаанд гаргах бүрт дэлгүүрийнх нь гадна уртаас урт дараалал үүсдэг учир эдний галзуу фэнүүд эртнээс байр байраа эзэлж байгаа юм.