29 настай залуу “Цагдаа байна“ гэж итгүүлэн гэрт нь орж, гар утас, ээмэг, бөгжийг нь авч зугтаажээ

Энэ оны дөрөвдүгээр сарын 4-ний өдөр бусдыг биеэ авч явах чадваргүй үед нь цагдаагийн албан хаагч байна гэж итгүүлэн залилсан хэрэг гарсныг олж тогтоон шалгаж байна гэж Цагдаагийн ерөнхий газраас мэдээллээ.

Тодруулбал СХД-ийн 12 дугаар хороонд оршин суудаг иргэн Д-г архи согтууруулах ундааны зүйл хэрэглэсэн үед нь 29 настай Н гэгч этгээд цагдаагийн албан хаагч гэж өөрийгөө итгүүлэн гэрт нь дагуулж орсон. Улмаар гар утас, мөнгөн болон монетон ээмэг, бөгж, түрийвч, бичиг баримт зэрэг зүйлийг нь залилан авч зугтаасан байна.

Хэрэв цагдаагийн албан хаагч албан тушаал, цол, нэрээ хэлэхгүйгээр хууль бус шаардлага тавьсан тохиолдолд иргэд бичиг баримтыг нь шалгах, сэжиг бүхий санагдсан бол цагдаагийн газрын 102 дугаарт хандахыг сэрэмжлүүлж байна.