Ам.долларын ханш чангарсаар 3546 төгрөгтэй тэнцлээ

Төгрөгийн эсрэг ам.долларын ханш чангарсаар байна. Монголбанкны өчигдөр зарласан албан ханш 3508 төгрөг болж гурван төгрөгөөр чангарсан бол "Найман шарга" валют арилжааны төвд нэг ам.доллар өнөөдрийн ханшаар 3535 төгрөгөөр авч 3546 төгрөгөөр арилжиж байна. Хэдий гадаад валютын нөөц "улаан гэрэл" асах түвшинд хүрээгүй 4.9 тэрбум ам.доллар байгаа ч төгрөг суларсаар байгааг эдийн засагчдын зүгээс өөрсдийн байр суурийг илэрхийлсээр байгаа билээ. Эдийн засагч Д.Ангар "Сангийн сайд Б.Жавхлан гадаад валютын нөөц 5 тэрбум ам.долларт хүрлээ гэснээс хойш ам.долларын ханш улам хурдтай өсөж эхлэв. Төгрөгийн ханш хурдтай унаж байна. Өнөөдөр 3535 төгрөгт хүрчээ. Ирэх 7 хоногоос 3540-3550 гээд явах шинжтэй. Тэгэхээр гадаад валютын нөөц өссөн гэдэг нь худлаа болж таарч байх шиг" гэж өчигдөр байр сууриа илэрхийлсэн. Мөн эдийн засагч Г.Батзориг "Зах зээлийн ханшийг мэдээлэлд хамгийн ойр өндөр дүнтэй хадгаламжтай хүмүүс л хөдөлгөнө. Түүнээс биш энгийн ард найман шарга дээр очоод солиулъя гэхэд шалихгүй. Тэр хүмүүс түрүүлж мэдээлэл авсан учраас хурдтай хөдөлж байна. Тэндээс ам.долларжилт явагдаж байна. Хүлээлтээс үүдэлтэй ам.долларжилт хүчтэй явагдаж, тэрийг нь мэдээлэлд ойр хүмүүс ашиглаад байна" гэсэн юм.