Дорнод аймагт 120 га талбай, Булганд 45 га талбай хээрийн түймэрт өртжээ

Дорнод аймгийн төвөөс баруун хойд зүгт 8 км-т Баянтүмэн сумын төвөөс зүүн хойд зүгт 10 км-т Хотонт багийн “Цайдам нуур” гэдэг газар хээрийн гал түймэр гарсан тухай дуудлагыг 04 дүгээр сарын 06-ны өдрийн 18:00 цагт хүлээн авчээ.

Тус аймгийн Онцгой байдлын газрын алба хаагчид, Баянтүмэн сумын Засаг даргын Тамгын газар, Хэрлэн сумын Засаг даргын Тамгын газрын ажилтнууд хээрийн гал түймрийг унтраахаар ажиллаж 22:00 цагт цурамд оруулан, 04 дүгээр сарын 07-ны өдрийн 14:30 цагт бүрэн унтраажээ. Урьдчилсан байдлаар хээрийн гал түймэрт 120 га талбай өртөж шатсан байна.

Мөн Булган аймгийн төвөөс зүүн урд зүгт 175 км-т Дашинчилэн сумын төвөөс зүүн урд 25 км-т Хараат багийн “Залай” гэдэг газар хээрийн гал түймэр гарсан тухай дуудлагыг 04 дүгээр сарын 07-ны өдрийн 13:55 цагт хүлээн авсан байна. Тус аймгийн Онцгой байдлын газрын Дашинчилэн сум дахь Эрэн хайх, аврах бүлгийн алба хаагчид, сумын Мэргэжлийн ангийнхан, орон нутгийн иргэд хээрийн гал түймрийг унтраахаар ажиллаж 19:13 цагт бүрэн унтраасан байна. Урьдчилсан байдлаар хээрийн гал түймэрт 45 га талбай өртөж шатжээ.