ТОД МАГНАЙН ЭМГЭНЭЛ

Энэ жилийн хувьд өнгөтэй сайхан наадам болж байгаа ч Их насны хурдан морьдын уралдааны үеэр нэгэн эмгэнэлтэй зүйл тохиолдсон юм.  Уралдааны дунд үед орж ирсэн, их насны нэг морь бахардан унахад хамгаалалтын цагдаа нар болоод ойр хавийн морь сонирхогчид яаралтай арга хэмжээ авахыг хичээсэн боловч морь хэдийнэ амьсгал хураасан байлаа. 

    Энд хамгийн сэтгэл шимшрүүлсэн зүйл бол уг морийг унан уралдсан  бяцхан хүүгийн нулимс. Нүдэн дээр нь өөд болсон хүлгээ хараад хүү өөрийн эрхгүй нулимс унаган, эхэр татан уйлж байсан юм. Тэр хавьд байсан гадны жуулчид, морин уралдаан сонирхогчид ч мөн сэтгэл эмзэглэж байлаа. Морийг амьсгал хураасан даруйд том оврын ачигч машин ирж, морины цогцсыг ачин явсан юм. Гэтэл ачигч машины тэвшинд бас нэгэн үхсэн морь байх нь тэр. Ингэхээр энэ жилийн наадмын морьдын уралдааны эхний өдөр хоёр морь ийнхүү бахардан унажээ.     

Дүр зураг үнэхээр элэг эмтрэм байсныг өгүүлэхэд ч хүндрэлтэй байна. Бид чинь моринд хайртай Монгол ард түмэн. Дахин ийм зүйл бүү давтагдаасай.