“Эрдэнэт” үйлдвэрийн захирал Х.Бадамсүрэнг АТГ шалгаж эхэлжээ

Өөрийн эзэмшлийн орон сууцаа 180 сая төгрөгөөр тохижуулсан, сард 25 сая төгрөгийн цалин авдаг, 300 сая төгрөгөөр автомашин худалдаж авсан гэх мэт мэдээллүүдээр нэг хэсэг “бөмбөгдүүлсэн “Эрдэнэт үйлдвэр” ХК-ийн ерөнхий захирал Х.Бадамсүрэнгийн тухай сөрөг мэдээлэл олон гарсан ч үүнийг хууль хяналтынхан шалгаж, шийдвэрлээгүй удсан.

Саяхнаас түүнийг Авлигатай тэмцэх газраас шалгаж эхэлсэн тухай мэдээлэл ирлээ. Ийн шалгах болсон шалтгаан нь түүнийг “Монголросцветмет”-ийн захирлаар ажиллаж байхдаа компанийн эзэмшилд байсан лицензүүдийг БНХАУ-д хууль бусаар худалдсан гэж үзсэнтэй холбоотой гэнэ.

Тэрээр 1994 оноос Орос Монголын хамтарсан “Монголросцветмет” нэгдлийн ерөнхий захирлаар томилогдож, энэ албыг 12 жил хашсан. Түүнийг энэ албыг хаших явцдаа “Монголросцветмет” нэгдлийн ерөнхий геологич М.Ариунбаяртай хамтран олон лиценз  “зохицуулсан” гэж ярьдаг бөгөөд улсын хөрөнгөөр нөөц нь тогтоогдсон ордуудыг “хоосон” гэж хуурамч баримт үйлдэн авч үлдээд, өөрсдөө зарсан байж болзошгүй байдаг аж.

Мөн түүнийг УИХ-ын гишүүн байхдаа Өмнөговь аймгийн Номгон суман дахь хар тугалгын ордыг хятадуудад өндөр үнээр зарсан хүн гэж ярьдаг. Тэрээр уг ордыг Алтайн бага уулсын дархан цаазат бүсэд багтдаг байсныг хасуулж, бүр 50-иадхан км-ын зайд хилийн боомт нээж өгөхөөр хөөцөлдөж байсан гэсэн мэдээлэл бий.

Түүнээс өмнө 2005 онд “Монголросцветмет” нэгдлийн захирлын суудлыг ашиглаж, жонш борлуулах гэрээг зах зээлийн үнээс хэт доогуур хийж өгсний шагналд 300 мянган ам.долларын авлига авсан, мөн “Шижир алт” ХХК-тай хамтран гаалийн татвараас зайлсхийж, улсад 860 сая төгрөгийн хохирол учруулсан зэрэг хэргээрээ улсын яллагчаас 7 жилийг чанга дэглэмтэй хорих ангид хорих ял эдлэх шийтгэл сонсож байсан ч шүүхээр хэргийг нэмэлт мөрдөн байцаалтад буцааж “замхруулсан” байдаг.

Medee.MN