М.Энхболд: Ц.Сандуйг огцруулах үндэслэлгүй, 60 тэрбум бол эвлүүлэг

МАН-ын Удирдах зөвлөл өнөөдөр хуралдаж, 60 тэрбумын схем тойрсон асуудлыг хэлэлцсэн ч намын дарга М.Энхболд, Ерөнхий сайд Ж.Эрдэнэбат нар 60 тэрбумын бичлэг бол эвлүүлэг учраас Ц.Сандуйд хариуцлага хүлээлгэх үндэслэлгүй гэж үзжээ.

Энэ үед бухимдсан шадар сайд  У.Хүрэлсүх М.Энхболд, Ж.Эрдэнэбат нарт хандан чаддаг юм бол бүгдээрээ ажлаа өгөөд асуудлаа шийдье гэж хэлсэн байна. Түүнчлэн УИХ-ын дэд дарга Ц.Нямдорж мөн намын удирдах зөвлөлийг бүрэн бүрэлдэхүүнээрээ огцрохыг шаардсан байна.

Улмаар хуралдааны явцад Ц.Сандуй “А.Ганбаатар бол миний найз. Мөнгөгүй, эрх мэдэлгүй байсан үед өөр яах байсан юм. Яагаад ойлгохгүй байгаа юм бэ” гэхчилэн сөрж, 60 тэрбумын асуудалд өөрийгөө буруугүй гэж үзэж буйгаа  хэлжээ.

Эцэст нь Нийслэлийн МАН-ын дарга, НИТХ-ын дарга Ц.Сандуйг албан тушаалаас нь халж, намаас хөөх асуудлаар санал хураахад Удирдах зөвлөлийн гишүүдийн 15 нь дэмжээгүй байна. Ингэснээр Ц.Сандуй албан тушаалдаа хэвээр үлдэхээр болжээ.