Говь ХК-ийн хандивын дансанд цугласан мөнгөний 50 хувийг ОБЕГ-т хандивлана

Говь ХК-ийн үйлдвэрийн барилгын дээвэр шатсан харамсалтай хэрэг гарсан. Тиймээс үйлдвэрийн үйл ажиллагаа тодорхойгүй хугацаагаар зогсоод байгаа юм. Үйлдвэрийн үйл ажиллагаа саатсантай холбоотойгоор иргэд, байгууллага, хөдөлгөөнүүдээс олон эерэг санал санаачлагууд гарч бараа бүтээгдэхүүнийг нь худалдан авахаас эхлээд бүхий л талаар дэмжихээ илэрхийлсээр буй. Тэгвэл Говь ХК-ийн зүгээс албан ёсоор хандивын данс нээжээ. Хандивын данс нээж буйн гол шалтгаан нь олон нийтийн чин сэтгэлийг ашиглан, брэндийн нэрийг барьж элдэв луйвар залилан гарахаас болгоомжилж буй аж. Түүнчлэн хандивын дансанд цугларсан мөнгөний 50 хувийг ОБЕГ-ын Гал унтраах албанд хэрэгцээтэй тоног төхөөрөмж, техник хэрэгсэл авахад зориулан хандивлахаар болжээ. Хандивын дансыг энэ оны есдүгээр сарын 1-ний өдрийг хүртэл ажиллуулах бөгөөд цугларсан мөнгөн дүнг хэрэглэгчдэдээ нээлттэйгээр мэдэгдэх юм байна.