“Банш” Батаагийн баншны бизнес амжилттай

“Мөрөөдлийн театр”-ын жүжигчин Д.Баттөмөрийг “Банш” Батаа гэх нэрээр нь илүү таних биз. Тэрбээр анх хошин урлагийн “Х-Түц” продакшинд ажиллаж байхдаа “Банш” нэрийг авсан. Одоо “Мөрөөдлийн театр”-т жүжигчнээр ажиллаж, цөөнгүй дэлгэцийн уран бүтээлд тоглож яваа чадварлаг нэгэн билээ.

Тэрбээр анх “Х- Түц” продакшинд байхдаа цагаан сарын хошин хөтөлбөрөөр жүжигчин Г.Нарансолонготой эхнэр нөхөр болж, гэртээ банш хийж зардаг залуугийн дүрд тоглосноос хойш “Банш” хочийг авчээ.

Тэгвэл жүжигчин маань хочоо бодит бизнес болгохоор шийдэж өнгөрсөн оны зургадугаар сараас бууз, баншны бизнес эрхэлдэг болжээ. “Дээдийн дээд чанар амтыг танд болон танай гэр бүлд зориулав” хэмээх уриатай “Нүдэн хүнс” компаниа найзтайгаа хамтран байгуулсан аж.

Жүжигчин Д.Баттөмөр энэ бизнесийнхээ талаар 11 суваг телевикийн “Тарагтай боов” нэвтрүүлгийн үеэр хэлэхдээ “Манай найз хамтран банш буузны үйлдвэр ажиллуулах санал тавьсан. Одоо энэ бизнес маань амжилттай үргэлжилж байгаа. Энэхүү үйлдвэртээ хүнсний аюулгүй байдал болон эрүүл ахуйн шаардлагыг бүрэн хангасан” гэж ярьжээ.

Түүний бууз, банш томоохон сүлжээ дэлгүүрүүдээр борлуулж байгаа бөгөөд эрэлт ихтэй байгаа ажээ.

NEWS.MN