АНУ Ким Чен Уны эсрэг хориг тавив

АНУ “БНАСАУ-ын удирдагч Ким Чен Ун болон тус улсын өндөр албаны 22 хүнийг хүний эрх зөрчиж байна” хэмээн үзэж, тусгайлан хориг тавьсан байна. “Өнөөдөр бид хүний эрхийг байнга зөрчиж буй Хойд Солонгосын удирдлагад хариуцлага тооцохын тулд нэг алхам хийлээ” гэж АНУ-ын Засаг захиргааны өндөр албаны төлөөлөгч сэтгүүлчдэд мэдэгджээ.

Хүний эрх зөрчигдөж байгаа талаар хэлэхдээ бөөнөөр хорих лагерь, Өмнөд Солонгос руу зугтахыг оролдсон болон эх орноо орхин гадаадад гарсан гэж хүмүүсийг мөрдөн мөшгиж байгаа зэргийг дурдсан байна. “Энэ хориг хүний эрхийг зөрчиж буй Хойд Солонгосын удирдлагуудын эсрэг авч байгаа анхны хориг. Вашингтон энэ хоригт орсон хүмүүсийн нэрийг цаашид шинэчилж байх болно” гэсэн байна.

Энэхүү хоригийг АНУ-ын Сангийн яам мөрдөж, нэр бүхий хүмүүсийн дансыг царцаах, Америкийн компани, хувь хүмүүстэй ажил хэргийн холбоо тогтоохыг хориглох аж. Энэ хориг БНАСАУ-ын удирдагч болон бусад албан тушаалтнуудад нөлөөлөх үү гэсэн асуултад АНУ-ын Засаг захиргааны төлөөлөгч “Энэ нь БНАСАУ-ын удирдагчидтай хамтран ажиллахыг хүсч байгаа дэлхий нийтийн бүхий л компани аж ахуйн нэгжүүдэд хатуу сануулга болно” гэж хариулжээ.