Хамгийн өвөрмөц хуушуурыг тодруулна

Үндэсний их баяр наадмын үеэр буюу энэ сарын 11, 12- нд “Монгол хуушуур-2016” фестивалийг зохион байгуулна. Уг фестивалийг монгол үндэсний уламжлалт хоолыг гадаадын жуулчид, зочид төлөөлөгчдөд сурталчлах, хоол хийх урлагийг хөгжүүлэх, наадамчдад амт чанартай хоол хүнсээр үйлчлэх зорилгоор Улаанбаатар хотын Засаг даргын тамгын газар, Монголын Тогооч нарын холбоо хамтран зохион байгуулж байгаа аж. Эл фестивалийн үеэр хамгийн өвөрмөц, амттай, цэмцгэр хуушуурыг тодруулан эздийг нь нэг сая төгрөгөөр шагнах юм байна. Мөн наадамчдын дунд “Хэн олон хуушуур идэх вэ”, “Хэн олон хуушуур чимхэж чадах вэ” зэрэг хөгжөөнт тэмцээнийг зохион байгуулахаар төлөвлөжээ.