Мөрийгөө алдсан тэрбумтан Ричард Брэнсон онгоцны үйлчлэгч болов

"Virgin" компанийг үндэслэгч Ричард Брэнсон мөрийгөө алдаж, онгоцны үйлчлэгчээр ажиллалаа. Тэрбээр "Формула-1"-ийн зохион бүтээгчдийн цомын тэмцээнд аль баг дээгүүр байр эзлэх талаар "AirAsia" нислэгийн компаний тэргүүн Тони Фернандестай мэтгэлцэж, мөрий тавьжээ. Мэдээж, Брэнсон өөрийн "Virgin Racing"-ийг, харин Тони Фернандес "Lotus Racing" компанийг дэмжсэн байна. Мөрийгөө алдсан нь Перт – Куала-Лумпур чиглэлд онгоцны үйлчлэгч болох ёстой байсан аж. Ингээд Брэнсон ялагдаж, мөрийгөө алдсан учраас үйлчлэгчийн улаан хувцсыг өмсөж, туфль углан нүүр амаа будаад ажилдаа оржээ. Нислэгийн турш сахалтай үйлчлэгч ундаа, хоолоор зорчигчдод үйлчилж байлаа.