БНСУ-д нутаг нэгтнээ хөнөөсөн 28 настай Монгол залууд 16 жилийн ял оноожээ

БНСУ-д нутаг нэгтнээ хөнөөсөн 28 настай Монгол залууд шүүхээс 16 жилийн ял оноожээ. Энэ талаар өчигдөр БНСУ-ын Ёнхап агентлаг болон бусад хэвлэлээр мэдээлжээ. Тодруулбал, өнгөрсөн оны арваннэгдүгээр сарын 4-нд Монгол Улсын иргэн 28 настай залуу нутаг нэгт 34 настай Б-тэй Сувон хотын Гвонсон дүүргийн цэцэрлэгт хүрээлэнд архи ууж байхдаа хутгалж хөнөөсөн хэрэг гарсан. Шалтгаан нь, эхнэрт нь бэлгийн хүчирхийлэл үйлдсэнийг тодруулахаар очтол уучлал гуйгаагүй, хэргээ хүлээгээгүй учраас уурандаа хөнөөсөн гэж мэдүүлжээ. Харин шүүхээс хэргийг урьдчилан төлөвлөсөн байж болзошгүй гэж үзсэн байна. Учир нь, шүүгдэгч биедээ зэвсэг авч явсан нь тогтоогдсон байна. Тэгвэл амиа алдсан Б-ийн ар гэр болох эхнэрийнх нь зүгээс хоёр хүүхэдтэйгээ үлдсэн тул хатуу шийтгэл ногдуулахыг хүссэн байна. Мөн шүүхээс "Шүүгдэгч гэм буруутай гэдгээ хүлээн зөвшөөрсөн ч ойлгоход бэрх шалтаг тоочиж гэмт хэргээ үгүйсгэж байна" гэж үзсэн байна.