ХХОАТ-ыг нэг хувь болгох нийтийн өргөдлийг 100 мянган хүн дэмжлээ

Цалин авч буй иргэд 10 хувийн ХХОАТ төлдөг. Үүнийг нэг хувь болгон бууруулах саналыг иргэн Р.Шинэгэрэл гаргаж, petition.parliament цахим хуудаст нээлттэй өргөдөл гаргасан юм. 

Уг өргөдлийг 100 мянган хүн дэмжиж гарын үсэг зурснаар Улсын их хурал энэ асуудлыг хэлэлцэх боломж бүрдэж байна. 

Монгол Улсын Их Хурлын тухай хуулийн 39.4.1-т хуулийн төсөл санаачлах саналыг 100,000 ба түүнээс дээш тооны иргэн дэмжсэн бол Улсын Их Хурал авч хэлэлцэнэ гэж заасан.

Өргөдлийн үндэслэл: Хувь хүний цалин, орлогоосоо төлдөг ашгийн татварыг 10% биш 1% болгож бууруулах. Иргэн баян бол улс хөгжинө!

Хувь хүний орлогын албан татварын тухай хуулийн 6.3-д заасан орлогод ногддог албан татварын хэмжээг 1 хувь болгож бууруулах, үүнд:

6.3.1. Цалин, хөдөлмөрийн хөлс, шагнал, урамшуулал болон тэдгээртэй адилтгах хөдөлмөр эрхлэлтийн орлого, 6.3.2. Үйл ажиллагааны орлого, 6.3.3. Хөрөнгийн орлого, 6.3.4. Хөрөнгө борлуулсан, шилжүүлсний орлого, 6.3.5. Шууд бус орлого, 6.3.6. Бусад орлого гэжээ.