Түргэн тусламжийн эмч, жолооч хоёр өвчтөнийхөө хамт зам тээврийн ослоор амиа алджээ

Төв аймгийн нутагт гарсан авто ослын улмаас түргэний машинд явсан 6 хүн нас баржээ

Орон нутгийн замд зам тээврийн ноцтой осол гарч, түргэний машин жолооч, эмч, зорчигдынхоо хамт 6 хүн нас барсан тухай мэдээлсэн.

Энэ талаар ЦЕГ-аас дэлгэрүүлэн тодруулахад "Цагдаагийн байгууллагад энэ оны 03 дугаар сарын 11-ний өдөр 19 цагийн орчим Төв аймаг Өндөрширээт сум “Талын-Уул гэх газарт автомашинууд мөргөлдөж, хүн нас барсан байна” гэсэн мэдээлэл бүртгэгдсэн.

Урьдчилсан байдлаар Төв аймгийн Өндөрширээт сумын нутаг дэвсгэрт байх Талын уул гэх газар буюу Улаанбаатар-Арвайхээр чиглэлийн авто замын 170 дахь км-н ойролцоо Toyota Hiace маркийн автомашины жолооч Э нь жолоодож яваад Улаанбаатар хотоос Завхан аймгийн чиглэлд зорчиж явсан Kia Grandbird маркийн том оврын автобустай мөргөлдөж, Toyota Hiace маркийн автомашинд зорчиж явсан 5 хүн, жолоочийн хамт нийт 6 хүн нас барч, 2 хүүхэд гэмтсэн ослыг Төв аймгийн цагдаагийн газар шалгаж байна" гэлээ. Нас барсан хүмүүсийн дунд хоёр нь бага насны хүүхэд байжээ.