Хэл заах анги яах вэ, хэдэн багшаа яах вэ

УИХ-ын Байнгын хороогоор "Боловсролын ерөнхий хууль"-ийг хэлэлцэж, чуулганы нэгдсэн хуралдаанд шилжүүлэхээр болсон. Гэхдээ уг хуулийн төслөөс олны анхаарлыг татаж буй хэд хэдэн асуудлын нэг нь АНГЛИ ХЭЛ.

Тодруулбал, Англи хэлийг үндсэн гадаад хэл байх тухай заасан. Үүнийг нь олон нийтийн хувьд дунд сургуулийн нэгдүгээр ангиас эхэлж заах гэж байна хэмээн бухимдаж буй. Гэхдээ хуулийн төсөлд яг тухайлсан анги зааж өгөөгүй бөгөөд зөвхөн БСШУЯ-ныхан гуравдугаар ангиас гэсэн төлөвлөгөөтэй гэдгийг холбогдох албаныхан илэрхийлээд байгаа. Гэвч энд өнөөдөр хүүхдүүдэд Англи хэлийг хэддүгээр ангиас заах биш, хэн тэдэнд заах вэ гэдэг асуудал илүү анхаарлын төвд байх ёстой баймаар.Мөн УИХ-ын зарим гишүүн Боловсролын ерөнхий хуульд “БИ”-гээр өвчилж, өөрсдийгөө дөвийлгөж суугааг харсан биз ээ.

Тухайлбал, УИХ-ын гишүүн Ч.Ундрам “Англи хэлний боловсролын лобби” бүлгийн ажлын үр дүн хэмээн онгирч сууна. Харамсалтай нь хэн нь ч юуг ч санаачилсан бай, “Саалиа бэлдэхээр Саваа бэлд” гэдэг хэлцийг тэд санасангүй. Англи хэлний байтугай багшийн хомсдолд улс нийтээрээ орчхоод байхад Боловсролын ерөнхий хуулийн ганцхан заалтаас болж онгирч, орилмооргүй байна аа, гишүүд ээ. Зөвхөн нийслэлийн хэмжээнд л гэхэд 2022-2023 оны хичээлийн жилд ерөнхий боловсролын 157 сургууль, насан туршийн боловсролын таван төв, нийт 162 байгууллага багш, боловсон хүчний хомсдолд орсон гэх судалгаа бий. Багшийн хомсдолд орчихсон боловсролын салбарын боловсон хүчнийхээ нийгмийн асуудлыг шийдвэрлэхгүй бол хичнээн сайн хуулийн төсөл байгаад ч урагшлахгүй гэдгийг гишүүд нь яагаад олж харахгүй байна вэ. Бага ангийн багш ч олдохоо байсан энэ үед гадаад хэлнийхийг нь бол төлбөр өндөртэй хувийн сургуулиуд урьж аваад, улсынхаас урвуулчихдаг болсныг мэдэж байгаа биз дээ.